Thlaraua Ṭhan Len

 

Thlaraua Ṭhan Len

-Rbt R. Vanlalruata

President

TKP New Secretariat Complex Unit

‘A hun ngaihtuah zawngin zirtirtu ni tawh hial awm in ni na a, Pathian thu bul ber, a aw b, te chu zirtir in ngai leh ta a, chaw rum ni lova hnute la ngai mi ang in lo nih tak hi. Hnute ring apiang chuan felna thuah hian hriatna an nei si lo, nausen an nih avangin.’ (Hebrai 5:12-13)

Keini, Thalai Kristian Pawl New Secretariat Complex Unit te chuan kumin kumpuan atan ‘Bible chhiar uar kum’ tih thupui kan lo thlang leh ta a. Pathian thu chhiar tam hian ringtu nun kawngah kawngro a su thui hle mai.

TKP member hi a tam ber chu Kristian chhungkuaa sei lian, tet te atanga Kohhran leh Sunday Schoola enkawlna lo dawng tawh thin kan ni hlawm a. Pathiana piantharna kan dawnna pawh hun eng emaw ti chen a ni tawh hlawm ngeiin a rinawm. Amaherawhchu, ringtu nun kawng kan zawhnaah hian puitling tawh tia inchhal hi a har em em a, a tu a mah hi ringtu puitling tia inchhal ngam pawh hi kan awm meuh awm lo e. 

A chunga kan Bible chang tar lan hi AD 60-na bawr vela ziak niin ngaih a ni a. A ziaktu tak hi hriat chian har viau mah se Tirhkoh Paula ziah tho nia ngai an tam viau. Thil chiang tak erawh chu he lehkhathawn ziah a nih lai hian Hebrai mite hi hun eng emaw chen Kristian an lo ni tawh a, mahse, tihduhdahna leh chhan hrang hrang avangin an rinna an lo kalsan leh ta hlawm a. Chung kara ringtu chak lo tak takte fuih thar tura ziah a ni.

Hebrai mite hi rinna kawngah  an thang lian mawh hle a, lehkhathawn ziaktu pawh hian a vei hle tih a hriat theih a. Chanchintha an dawn hun ngaihtuah chuan zirtirtu ni tawh hial awm si kha a bul atanga Pathian thua chawm that leh fo an ngai tlat mai a ni.

Keini pawh hi han inen chiang ila Hebrai mite ang deuh hi kan ni fur hian a rinawm. Pathian thua chawm sei len ni si hi kan thlarau nun hian hma a sawn mawh khawp thin mai. Pathianin min beisei dan, mi dangte tana rah chhuah tur leh mi dangte zirtirtu ni tawh tura beiseite hi an beisei kan phak lo hlein a rinawm.

Pathianin min beisei dan, ringtu puitling ni tura kan mamawh ber chu eng dang ni lovin thlarau chaw ‘Pathian thu’ hi a ni. Pathian thu hi kan buaipui loh a, kan zir ngai loh a, kan nunpui ngai loh chuan engtikah mah rah chhuah tur kan nei lo ang. Chuvangin, kumin chu kumpuan atan ‘Bible chhiar uar kum’ tih kan han nei ta bawk a, thlaraua kan than len phah hialna tur khawpin Pathian thu hi han buaipui ila, zir chiang ila, chhiar tam ila, nunpui theuh  i tum ang u.

Isua Baibul a tha e,

Pathian thilpek a ni e;

Thiha thawhlehna a hril e,

Nunna thu a ni e.

 

Aw Baibul, aw Baibul,

Ka ngai, ka thlahlel em e;

Aw Baibul, aw Baibul,

Pathian Lehkhabu hi.

___________________________________________________________________________________

He sermon hi ṬKP NSC Unit Chanchinbu POIEMA ah pawh chhiar theihin a awm e.