KRISTA LEH KOHHRAN TAN
- Upa PC Vanlalrova Senior Adviser, MṬKP
He khawvela mihring lo piang chhuakte hi pian chhan neia piang vek kan ni a, kan dam pawhin dam chhan eng emaw tak nei vek kan ni. Pian chhan leh dam chhan hlen chhuak tura kan chet vel dan hian kan puitlin leh puitlin loh a hril a, kan thiltih engkim mai hi kan pian chhan leh dam chhan tihlawhtling tura kan chet velna a lo ni vek mai. Ṭhenkhat chuan an ngaihzawngte chu an dam chhan niin an hria a, \henkhat chuan an chhungkua, an eizawnna, sum leh paite chu an dam chhan niin an hria a, an beiseina tihlawhtling turin theihtawp an chhuah ṭhîn. Chutiang nun ramah chuan hlawhtlinna a lo thlenin an lawm a, hlawhchhamna a lo thlenin a hmachhawn danah an buai fo ṭhîn.
Pathianin a Fapa Isua Krista hmangin min chhandam a, pian chhan dik, dam chhan dik leh nun chhan dik min kawhhmuh ta a. Chu pian chhan leh dam chhan kan hlen chhuah dan chu ringtu ṭha kan nih leh nih loh tarlangtu pawimawh tak a ni. Krista tana an thinlung, ngaihtuahna, finna, thiamna leh theihna hmang nasa apiangte chuan pian chhan leh dam chhan hlen chhuaktu ṭha nih an hlawh ang a, van thlengin chawimawi an ni dawn a ni.
Mihringte tana nun chhan hlu ber chu Krista a nih avangin ‘Krista tan’ tih chu kan dam chhan a ni. Krista tana nun tih chu nun laipui atana Krista hman tihna a ni. Krista avangin mihringin nun dan a thiam ṭhin. Kan ni tin nun, chetzia leh thiltih apiangte hi Krista avang leh Krista tan a nih phawt chuan mihring nun hian a dai sual tak tak thei ngai lo. ‘Krista Tan’ tia ke pen ngam, ṭang ngam, hma la ngam, thawk ngam, nung ngam hi Pathianin a duh a, a zawng a ni. ‘Krista leh Kohhran Tan’ tia thu tiamtu ṭhalaite hian theihtawp kan chhuah zel a ṭul a ni. Krista tana thawh hlawk apiang hi an lawm a, a nel apiangte hian a duhawmzia an hmu ṭhîn.
Isua Krista nena inzawm tlat chu Kohhran hi a ni a, a thisen a lei, a taksa chu a ni. ‘Krista leh Kohhran tan’ tia thu tiamtu chuan Kohhran huang chhung aṭangin rawngbawl hna a thawk ang a, Kohhran tan ṭhahnem a ngai ang a, Kohhran hmasawnna leh ṭhan zelna tur a ngaihtuahin a thawkrim tur a ni. ṬKP huanga inhmang tak, Kohhran (i.e. Kohhranpui) huanga che hlei thei lo, inkhawm ṭha peih lo, hnatlang ṭha peih lo, Kohhran programme-a lang ngai mang lote hian Krista an hre chiang lo va, Kohhran pawh an hre chiang lo a ni. Kohhran huang chhunga chet tlat peih lohna hi sual hnathawh a nih avangin Krista neitu chuan a taksa Kohhran a hmangaih tur a ni a, Krista leh a Kohhran inlaichin dan a hre chiang hle tur a ni.
Krista chu a taksa Kohhranah a chen tlat avangin ringtu chu a Kohhran-mi hle tur a ni. He khawvela a tana thawk tur hian Krista hian a Kohhrante lo chu hmanrua a nei chuang lo tih kan hre fo tur a ni. ‘Kohhran Tan’ tih hian Kohhran belh tlat, inkhawm tlat, theih ang tawka sum leh pai thawh, hnatlannaa tel ve tlat, Kohhran hmasawnna tur atana ṭhahnemngaih, Kohhran hmangaih, mahni thiam zawng(talent) Kohhran tana hman ṭangkaite a huam vek a ni.
Chanchin Ṭha a thlenna hmun apiangah Kohhran a ding zel a, Krista hmangaihtu an punna hmun apiangah Kohhran member an pung a, Krista tana inpe an tamna hmun apiangah Kohhran a nung ṭhin. Chuvangin ‘Krista leh Kohhran Tan’ theihtawp chhuahin thawk ila, Amah(Krista) avanga nung, che leh awm kan nih avangin a taksa, Kohhran huang chhunga chengin rawngbawl hna i thawk sauh sauh ang u.
