GOOD FRIDAY - Rev CL Hminga
Lal Isua thlan aṭanga a thawh leh ni (Easter Sunday) hma Zirtawpni chu Isua Kraws a khenbeh ni champhaphak serh a ni a, Good Friday tih a ni. Hei hi Kohhran lo din tantirh lai aṭang tawh a hman ṭan niin an hria a. Chaw nghei leh insum ni, sual sim entir nana intihhrehawm ni a hman a ni \hin. Roman Catholic Kohhran chuan nitin Lalpa zanriah, Daily Mass an nei ṭhin a, Good Friday leh a tuk Inrinni (Holy Saturday) an tihah chuan mass an nei lo.
Tuna khawthlang Kohhranin an hman dan chu bung thumah a ṭhen theih a : (1) Pathian lehkhabu chhiar leh ṭawngṭai leh a tuarna lam hla sak (2) Kraws ngaihsanna entirna (3) Kraws thisenin a tih thianghlim hmaa sual ngaihdam dilna, ngaihdamna avanga lawmthu sawina.
Hemi ni hian dar pawh an vaw lo va, incheina pawh a dum a ni a, biak in maicham khuhna puante pawh an hlip vek ṭhin. Chutianga hmanna chu Kohhran siam ṭhat (Refomation) lai khan an tibo vek a. Church of England Kohhran chuan Lalpa Zanriah Sacrament an nei ṭhin a, tunlai tak erawh hi chuan an ti leh tawh meuh lo.
Kohhran zalenho, sap hovin Free Church an tih, sawrkar thu hnuaia awm ve lote chuan chawnghei aiin ruai ṭheh nan an hmang zawk a, Europe ram Protestant Kohhranho chuan inkhawm pangngai sermon sawina hun leh Lalpa Zanriah Sacrament eina hunah an hmang ṭhin.
Roman Catholic Kohhranah chuan inkhawm chi thar an ching chhuak a, chhun dar 12 aṭanga chawhnu dar 3:00 thleng a awh ṭhin. Reformation hnuin Jesuit-hovin an chin chhuah chu Church of England ho pawhin an ching ve ta viau va, Kraws tun din hun an ti a, chawhnu dar 3:00 ah an nei ber ṭhin. Tlaiah sermon sawina inkhawm an nei leh a, ‘Mari khawharna’ tiin an vuah. Greek Kohhranah chuan, Good Friday ti lovin ‘Great Friday’ (Zirtawp ni ropui) an ti zawk ṭhin.
Mizoramah hian hman lai deuh chuan Good Friday hi ruai ṭheh nana hmangte an awm ṭhin a, tunlai erawh chuan hmang an awm ta meuh lovin a lang. Lal Isua tuarna lam hla saa zaikhawm te, a tuarna lam thuchah sawina inkhawm te kan nei ṭhin a, Lalpa Zanriah Sacrament eina huna hmangte kan awm bawk a. Heng hi a inhmeh vekin a lang.
A pawimawh ber chu Lal Isuan kan tana min tuarsakna kan hriat nawn thar leh a, a tana kan inhlan thar leh hi a ni a, a tuarna la hre lote leh a chhandamna la chang loten an lo hriata an lo chan ve theihna tura kan hriattirna hun ṭha tak a ni bawk.
Good Friday hi khawvel chhandamtu Lal Isua la hre ngai loten an hriat hun lo ni se, an tan Good Friday a ni ngei ang; a hre tawh, ngaisang lote pawhin kan thinlung hneh khawpa kan hriatna lo ni se Good Friday a ni bawk ang.
