LAL ISUA RINGTU TAK DINHMUN - Rev HS Luaia
[“A hnehtu apiang ka mana thuruk ka pe ang a, lung var ka pe bawk ang; chu lungah chuan mi dang tuma hriat loh, a dawngtu chauh hriat tur hming thar a chuang a ni” (Thupuan 2:17 b) (lehlin thar)]
Isua hmangaih Johana chuan Lal Isua hming avanga Patmos thliarkara a tan lai khan khawvela ringtute dinhmun leh an chan tur Pathian Thlarauvin a hriattir lai khan Kohhran hruaitu hnena sawi tura a hrilh chu he thu hi a ni a. Thil chhinchhiah tur pathum pawimawh tak a awm a.
Pakhatnaah chuan Mana thuhruk a ni a. Exodus 16:33-ah Arona chuan Mosia thupek angin bela mana chu a dah ṭhat thu leh Hebrai-ah thuthlunna bawm chhungah rangkachak bela mana dah ṭhat thu chu kan hmu a. Judate chuan hei hi Zawlnei Jeremia chuan Sinai tlang lung keh karah a thukru niin an sawi bawk a. Sawi dan hrang hrangin hemi awmzia hi hrilh fiah a ni a. Amaherawhchu, a pawimawh berah chuan Joh. 6: 31-35-ah Lal Isuan “Kei hi nunna chhang ka ni” a tih angin amah Lal Isua neitu tihna a ni a. Hei hi kan tunlai khawvelah hian a pawimawh zual telh telh a ni. “Khawvel hi bo mah se Isua ka nei” tih hla hi i thinlung takin i sa thei em? Tunlaia sakhua zawng zawng thuhmuna sawitute zirtirna te hian i thinlungah thu a nei em? Petera angin “Lalpa tu hnen dangah nge kan kal ang, nangin chatuana nunna thu i nei alawm” kan ti ve thei tak tak em? (Joh. 6:68).
A pahnihnaah chuan “lung var ka pe ang,” tih hi a ni. Hei hian awmze pahnih a nei a.
(1) Hetih lai hian roreltute chuan lung dum leh lung var an keng a, thiam chang zawk entir nan lung var an pe thin a, thiam loh chang chu lung dum an pe thin a.
(2) A dang lehah chuan khawpui chhunga chengte chuan khawpui nihna entir nan lung var an nei ṭhin a, ram danga an zinin an keng ziah ṭhin a, an lo hawnin khawpui hungna bula santri dingte chuan chu lung chu an hmuh chuan luh an phal ṭhin a, chu lung nei lote chu an luhtir ngai lo.
Hei hian Lal Isua neitute pawimawhzia a entir a, keini mi fel lo leh mi sualte pawh hian Lal Isua zarah thiam channa leh thisen zarah van mi nihna kan chang a, “Tu pawh ka tisa ei a, ka thisen in chu keimahah a awm reng a, kei pawh amahah ka awm reng a ni” tih ang khan (Joh.6:56).
Lal Isuan a ngaih pawimawh em em chu Joh. 6:53-56 ah hian a sawi a. “Thu dik ka hrilh a che u; Mihring fapa tisa in ei a, a thisen in in loh chuan nangmahniin nun in nei lo ve. Tu pawh ka tisa ei a, ka thisen intu chuan chatuan nunna a nei tawh” a ti a.
Sakhua zawng zawng intluk tlanna zirtirna (Pluralism) hian tunlai khawvelah mi tam tak harsatna a siam a nih chuan heti laia Lal Isua thu sawi hi chhiar ngun rawh se. Lal Isua naitute tan chauhva khawpui luhna hi a awm a ni, tih hriat a va ṭul em!
A tawp berah chuan, a dawngtu chauh lo chuan tuma hriat loh hming thar, tih hi a ni. Lal Isuan, Nikodema hnenah “I piang thar tur a ni, i pian thar loh chuan” a ti ang kha a ni a. “Lalpa, Lalpa mi ti nazawng chu van ramah an lut lovang a, ka Pa vana mi duhzawng titute erawhchu an lut ang” (Mat.7:21) a tih ang kha a ni ta a ni.
Sap Upa lehkhabu siam ka naupan laia ka hmuh ka la hriat reng chu “Nang hi i danglam tawh em?” tih a ni a. Hei hi zawhna pawimawh tak a ni.
Krista hnenah khenbeh ka ni ta, nimahsela ka nung a ni... Krista chu keimahah a nung zawk a ni” a ti a. (Gal.2:20). A va ropui em! Pathian thlarau aṭang chauh lo chuan tuman Isua chu Lalpa an ti thei lo. Thlarauah lo chuan pian thar theih a ni bawk hek lo. Tun hi inbuatsaih hun, hun lawmawm chu a ni, tun hi chhandamna ni chu a ni, Kohhran tihduhdahna pawh khawvel hmun hrang hrangah a zual zel. Lal Isua nena in inkar thu hi tihfel a va hun em! Thlarauvin Kohhrante hnenah thu a sawi hi hriat theihna beng nei chuan ngaithla ngun rawh se. “A hnehtu apiang ka mana thuhruk ka pe ang a, lung var ka pe bawk ang: chu lungah chuan midang tuma hriat loh a dawngtu chauh hriat tur hming thar a chuang a ni.”
“I vanram lehkhabuah ka hming a chung tawh e?” Amen.
